|
| |||||||
| Проза/Поэзия Искусство образного выражения мысли в слове; изображение жизни, создание художественных образов при помощи слова. |
 |
| | Опции темы |
25.07.2008, 00:40
| #291 (ссылка) |
 | Седарчийн буьйсано биллинчу б1аьрго Тийналлин 1индаг1на ца бетта пе. Сайн дагалецамехь ас лоьху м1аьрго Дуьххьара ялийнарг хьо сайна т1е. Мархаш а к1ад ца ло беттаса къийса, Х1авао шайна т1ехь мел буг1у бохь. Хьан вастан б1арлаг1а тховса а хьийза Мохтиле ца карош сан б1аьргаш чохь. Буц а ю, зезагий оьхкина коча, Баьццарчу юьхьт1ера д1ахьоькхуш тхиш. Бохь-генаш уьйт1арчу хьаьрсачу хьочан Лоькхуш 1а сан дагна хьоьх лаьцна йиш. 1аламан аьзнаша буьйсанан карахь Хьо дагатийсарна кула ца йо. Сан ч1ог1а садукъло г1айг1анан марахь, Ойланийн куьг кочехь ца хилча хьо. Баттана юххера седарчийн хорха Маццалцца хир ю-те сан б1аьргийн стом? Эхарта йоьдуш сайн оьмаран йорг1а, Дин хийца йиш йоцу бере ву со-м… Хоттане, 1980 шеран аьхке
__________________ Хьо юххехь хилча, соь дагарло седарчийн терахь...  |
|  |
|
25.07.2008, 00:44
| #292 (ссылка) |
| | * * * Дарц даларх лекхачу ломахь, Махо а лекхарх шок-зурма, И аьрзу ца юху боларх, Цо дегI шен латтадо кура. Йисарх а тIемаш а дойна, Ницкъ боцуш цу стигла яла, И гур яц гIелйина ойла, Балхабеш шегара бала. Хилла-кха олуш цундела Тохара ахь соьга, нана: «Халонех цкъа а ца кхера Ламанан аьрзунах Iама…» Хоттане, 1975 шо
__________________ Хьо юххехь хилча, соь дагарло седарчийн терахь... |
|
| |
|
25.07.2008, 00:44
| #293 (ссылка) |
| | 1аьнан сибат Чимаш хиларх к1еда, хаза, 1а-м ду буьрса, шийла ша. Генаш хьедо шайн бертаза Лайно г1орош, дитташа. Тхов т1ехь, махах лачкъа г1ерташ, Хебна 1а цхьа цхьалха къиг. Йоккху цхьамма шен ков-кертахь Г1овг1а, тухий ондда диг. Лаьттан юьхь т1е и к1айн басар Хьаькхна 1аьно шийлачу… Салазаш чухоьхкуш басах Тхан юьртара бераш ду. Ло дилланза, 1а ца кхочуш Меттиг йисина а яц. Механ коча хьерча коча Чимийн овгалш. Долу дарц… Хоттане, 1977 шеран декабрь
__________________ Хьо юххехь хилча, соь дагарло седарчийн терахь... |
|
| |
|
25.07.2008, 14:36
| #294 (ссылка) |
| | Девеше... Гина вац хьо дийна волуш суна, Я ца девза ахь даьхна хьуьнарш. Аш, б1аьхоша, маршо яккха тхуна, Лардина вайн мехкан латтанаш. Яийтира Даймахко повестка, Шен мог1аршка кхойкхуш г1уллакх дан. «Нана, ахьа са ма гатде, кестта Воьрзур ву со толамца вайн ц1а», — Уьш дара хьан т1аьххьарлера дешнаш… Т1ом д1абаьлла яьлла дуккха хан. Оцу т1амо алсамдехи кешнаш, Чевнаш йи цо нанойн дегнашна. Т1амо витац, хиларх цхьанхьа доьшуш, Къестабац поэташ, артисташ. Хиларх нана хьан ц1ахь хьоьга хьоьжуш, Дог сацош, цо кийра дутту даш… Машаре бу стиглахь х1ора седа, Беттан серло дебон г1ерта тхи… И тхи дуй-те, шу д1ахьовсош, х1етахь Наной б1аьргех дийлла долу хи… Хоттане, 1975 шеран июнь беттан 22 де
__________________ Хьо юххехь хилча, соь дагарло седарчийн терахь... |
|
| |
|
25.07.2008, 14:42
| #295 (ссылка) |
| | Мел атта кхоллало илли, Хьан бIаьргийн седарчий гуш. ГIевланга сан васт а диллий, Дохдехьа хьайн гIенан гIуш. ЧIагIбехьа мукъам сан шовкъан, Хьайн зевне аз хуттуш тIе, Ца хирриг иллешна новкъа Хьайн деган гIелъелла цIе. Вехьа со бIаьстенан декъах ГIитточу хьайн дагчохь зов. Ас юхьарлаьцначу некъах Тохахьа безаман тов. Хоттане, 1978 шеран март
__________________ Хьо юххехь хилча, соь дагарло седарчийн терахь... |
|
| |
|
25.07.2008, 14:43
| #296 (ссылка) |
| | Сан некъ.. Сан некъ — хьо бу суна, теша, Г1улч иръен аьлха. Ахь кхоьхьу сан ирсан беша Азанаш маьлхан… Сан некъ, хьоь сатуьйсуш даим Анасиз лаьтта — Стигалх д1а ца оьйтуш дай и-м Вайн къинойн латта… Сан некъ, ахь гаре сатуьйсу Хьайн ваша — дог1а… 1аьржачу мархаша луьйсу Г1арг1улийн мог1а… Луьсту ахь гарш, новкъадахарш, Ойланаш ячош, Гергарчийн 1ожаллеш, дахарш, Безамаш, ачош… Сан когех хьожа а йохуш, К1амво ахь кхерста. Ойланаш сан акха йохуш, Хьо керта леста. Хетало хьан галцаш наггахь: Цкъа — вон, цкъа — дика. Хьайна сан г1улч-болар магахь, Абде со вига… Сан дегайовхонаш лаьтта Д1о х1уьц1ий-ч1уьч1ехь… Бижахьа, сан некъ хьо, лаьтта — Сан кхиэлан куьцехь… Хьайн кераюккъе со виллий, Хьуо суна хьиеха… Сих-сиха олуш сайн илли, Со хьоьца веха… Хоттане, 1982 шеран март
__________________ Хьо юххехь хилча, соь дагарло седарчийн терахь... |
|
| |
|
26.07.2008, 02:05
| #297 (ссылка) |
| | Къена луо Миска луо-яI, хьох къахета суна. Макхделла хьо, байна хьан кIайн бос. Вовшашна хьо кхуьйсуш, горгдеш буйнахь, Ловзуш ца го арахь берийн цIоз. Ца до цара, хьалха санна, тергал, Ца къерало церан хьоьца са. Ховха бIаьсте мел гIоьрти а герга, ГIеллуш, ахьа-м халла доьIу са. Урамновкъахь, тхов тIехь ду хьо кхачош, ДIадайна хьан чимийн дато аз. Адамаша хоттах юьзна мачаш ЦIанйо хьоьца, когаш хьоькхуш раз. Миска луо-яI, хьох къахета суна. Макхделла хьо, байна хьан кIайн бос. Вовшашна хьо кхуьйсуш, горгдеш буйнахь, Ловзуш ца го арахь берийн цIоз. Даьрг1а, 1975 шеран март
__________________ Хьо юххехь хилча, соь дагарло седарчийн терахь... |
|
| |
|
26.07.2008, 02:07
| #298 (ссылка) |
| | Безаман зезаг БIаьста вай вовшашна дуьххьара гира. Сирлачу безамах вай кад буьзира. Алсам ма-даьллинехь вай вовшийн дезар, Безаман кеда чохь делира зезаг. Безаман мерза мутт шен кийра эцна, И хьала кхиънера, патарш а хецна. Цкъа цхьана дийнахь хьо дIаяхча генна, Вайшиннан зезаг ас хьоьстура денна. ХIетте а, гIелделла дисира иза, Уллера дIадевлча хьан кхиэлан сизаш. Букар а дуьйлира, маргIал а делла, ЦIаерза кхоччуш хьо хьеелла дела. Кестта хьо цIа кхачахь, сан ирсан седа, Керла мутт IаьIар ду безаман кеда. Цу кедахь безаман зезаган орам Юха а денлур бу, вай даханора! Хоттане, I974 шо
__________________ Хьо юххехь хилча, соь дагарло седарчийн терахь... |
|
| |
|
26.07.2008, 13:04
| #299 (ссылка) |
| | Хьекъале латта Моллас дIанисбешшехь упханийн лами, Шабарца лаьтто а элира «Амин». Коша тIе буттушехь хих буьзна чами, Лаьтто а шабарца элира «Амин». Чурта тIе язъелча стигалан ами, Элира шабарца лаьтто а «Амин». Мохь тоьхнна доIа дан хилча а аьтто, Со теша, и дийр ма дацара лаьтто. Велларг а, шех терра, тийна гуш, атта Кхетара веллачух хьекъале латта. Хоттане, 1980 шеран октябрь
__________________ Хьо юххехь хилча, соь дагарло седарчийн терахь... |
|
| |
|
26.07.2008, 13:05
| #300 (ссылка) |
| | Адамашка Цхьанна а гиний-те, буьйсанех иэдеш сан денош, Гуьйрено лайн чимаш, ткъа Iаьно можа гIаш Iенош? Цхьанна а хаьий-те, хьунаре сан болар делош, Мила ю сан некъийн чевнашна дарбанаш лелош? Сахалин-гIайрене муьлхачу кхожо со тесна? Дахаран хеттаршна жоьпаш а ас муха эцна? Адамаш! Мацца-ъ со дIавоьдуш эхартан пана, Ас шуна яржийна юьтур ю сайн иллийн кана. Амма мел лерина листарх сан оьмаран жайна, Цхьанна а хуур дац ас мичахь хIун бала лайна. Цундела ма мотта со ваьхнехь, ца лелош хIилла, Диканах вуон къасто ца хаъал со Iовдал хилла… Талдысай, 1982 шеран июнь
__________________ Хьо юххехь хилча, соь дагарло седарчийн терахь... |
|
| |
|
| Опции темы | |
|
Похожие темы | ||||
| Тема | Автор | Раздел | Ответов | Последнее сообщение |
| 1илман Юсупов - стихаш | Amazonka2 | Проза/Поэзия | 1827 | Вчера 22:04 |
